هتف الاولاد
واحنا هتفنا كلنا
((يا شهيد نام وارتاح الثوره تمت بنجاح))
نزلت دموعنا مننا
وفى حضن مصر المؤمنه نام الشهيد
فى ميدان التحرير ملاين م المصريين
حسيت وانا ماشي وسط الناس اننا راجعين
شايليين احلام الثوره بجد
وسنين السد
وعرابي وسعد
وجمال بينادى صلاح الدين
_ _ _ _ _
وقابلت كتير فى التحرير
يشبهو بعضيهم
لون البشره
علبة كشري
والتحليه كوباية شاى
متقوليش اتلمو ازاى
لكن بص تلاقى عيونهم
فيها طيابه..وفيها وداعه
لكن بردو فيها نزير فى التحرير
_ _ _ _ _
الست وفاء عامر عمرها سبعين
مدت لى اديها قالتلى كلام
والضحكه فل وياسمين
الله يرحمكم يا اولادى يا فخر بلادى
كان الدعا مهموس الصوت
حسيت بحياة نبت العشرين
كان وقتها السنتى ..براح على زحمه كل الواقفين
عدى عليها ملاك الرحمه
طارق حلمى ..طبيب جراح
((يا شهيد نام وارتاح الثوره تمت بنجاح))
_ _ _ _ -
وقابلت كمان سالى زهران
المجنونه بعشق مصر
والمعجونه بتراب مصر
ضحكتنى اجمل ضحكه فى كل الكون
وقالتلى
بالذمه مش دا عالم مجنون
احنا نقول للناس سلميه
يحاصرنا كل الحرميه
ويحرقنا نيرون
_ _ _ _ _
وقابلت هناك كريم بنونة
وعمرو غريب
وولاد من عمر ولادى
الضحكه فى القلب فانوس من ليل رمضان
واللمعه فى العين شلال
فرح والوان
وبشهد حوليا فى كل مكان
احمد بسيونى..سيف الله
وكتير ياما فى التحرير
ضحك النيل فى حدود اسوان
سلم على كل الملاين
ضحك وقال النيل
اولادى فى حضنى وحوليا
مين زيي او شبهى..دا مين
_ _ _ _ _
وبطلنا من وسط الناس
مش فارس جى على حصان
من المنصوره والشرقيه
من نطفه مينا وعرابي
من بطن الام المصريه
_ _ _ _ _
واللى يعادى الشعب يموت
ولا فى بعد الثوره سكوت
_ _ _ _ _
الصوت العالى للشهداء
ولأجمل مصر
والموت للخونه والبعدا
اعداء النصر
_ _ _ _ _
عاش الشهيد
بقلم مدحت العدل(صحفى بجريده الاخبار)
اليومية